Month: February 2018

Ministria për Evropën dhe Punët e Jashtme njoftoi se Greqia ka marre vendim të tërheqë rezervën për Vulën Apostile ndaj Shqipërisë. Në njoftimin dërguar për mediat, MEPJ tha se ky vendim ishte marrë me efekt të menjëhershëm.
“Tërheqja e rezervës për Vulën Apostile ka një impakt pozitiv praktik kryesisht për qytetarët shqiptarë që jetojnë e punojnë në Greqi duke lehtësuar dhe përshpejtuar procedurat e marrjes dhe përdorimit të dokumenteve të lëshuara nga institucionet shqiptare dhe greke, si dhe duke ulur ndjeshëm kostot e lëshimit të këtyre dokumenteve”, tha MEPJ.
Ajo shtoi se vetëm gjatë vitit 2017, kostot e përballuara nga qytetarët shqiptarë për shkak të aplikimit të vulës apostile nga autoritetet greke kanë kapur vlerën e 6.7 milionë euro.
“Ky vendim i qeverisë greke përbën një angazhim të përmbushur në kuadër të dialogut dypalësh Shqipëri-Greqi për çështjet e mbetura pezull prej një kohë të gjatë”, tha MEPJ, duke lënë të kuptohet se kjo ka qenë nje nga temat për të cilat është rënë dakord gjatë diskutimeve të kohëve të fundit mes delegacioneve të të dy vendeve.

Europa vazhdon të jetë e mbërthyer nga moti i keq. Në Britaninë e Madhe, pamjet e realizuara nga shërbimi ajror i policisë londineze japin qartë idenë e efekteve të “bishës nga lindja”, siç është pagëzuar acari i ardhur nga Siberia. Pamjet tregojnë të ftohtin që vërshon në horizont, duke kaluar me re dhe dëborë mbi Londër dhe qytete të tjera. Udhëtarët janë përballur me vonesa dhe anulime të lëvizjeve në transportin publik, si dhe probleme për shkak të ngricave në trafikun rrugor, ku janë regjistruar 4 viktima. Në disa zona të Britanisë pritet që temperaturat të bien deri në minus 15 gradë celsius.

Problemet vijojnë edhe në Itali. Në stacionet hekurudhore të vendit fqinj janë verifikuar radhë të gjata në sportelet e biletarive, për shkak se shumë trenë janë mbipopulluar nga pasagjerët ndërsa të tjerë kanë anuluar udhëtimet e parashikuara. Janë 43 trenë të shpejtësisë së lartë që kanë ndërprerë shërbimet, 11 prej të cilëve në Milano, 11 në Napoli, 8 në Romë, 2 në Palermo dhe nga 1 në Ankona, Taranto dhe Leçe. Sipas agjencive italiane, i ftohti pritet të arrijë pikun mëngjesin e së mërkurës, me temperaturat që do të zbresin deri në minus 6 ose minus 7 gradë Celsius në zonat fushore. Acari siberian ka kapur të papërgatitur Napolin dhe qyteti është mbuluar nga dëbora si rrallë herë më parë. Situata ka detyruar bashkinë të urdhërojë mbylljen e shkollave edhe gjatë së mërkurës.

Ndërkohë, “bisha nga lindja” është shtrirë deri në Spanjë, ku më alarmante për shkak të akullit dhe ngricës situata paraqitet për pjesën qendrore dhe veri-lindore, sidomos në Katalonjë, ku trafiku rrugor ka hasur problemet e para. Lëvizjet e kamionëve të tonazhit të rëndë janë ndaluar, ndërkohë që situata pritet të përkeqësohet gjatë natës dhe të mërkurën.

Presidenti i Republikës, Ilir Meta deklaroi sot nga studio e Eni Vasilit se kërkon informacione shtesë, edhe pas dokumentit të dytë që Ministria e Jashtme i dërgoi kreut të shtetit në vijim të kërkesës së saj për plotfuqi në negociatat me Greqinë.
“Janë kërkuar materiale të tjera shtesë. Kemi bërë të qartë se çfarë kërkohet nga ana e Presidentit. Pastaj ka pasur një reflektim nga Ministria e Jashtme, i cili në disa elementë është vlerësuar për t’u plotësuar më tej” tha Presidenti Meta.

Presidenti Ilir Meta komentoi dhe çështjen e negociatorit Artur Meçollari gjatë intervistës për gazetaren Eni Vasili. Ai tha se nuk kishte informacione të detajuar për të, por ka kërkuar çdo hollësi nga institucionet përkatëse.
Presidenti Ilir Meta tha se negociatoritArtur Meçollari kishte treguar integritet, pasi kishte çuar në prokurori mosmbylljen e çështjes për marrëveshjen e vitit 2009.