Vetëvendosje nuk do ta votojë demarkacionin

451

Marrëveshja e djeshme mes krerëve të koalicionit qeverisës dhe LDK-së lidhur me ratifikimin e Marrëveshjes për demarkacionin e kufirit me Malin e Zi, nuk ka bindur Lëvizjen Vetëvendosje për ta votuar këtë marrëveshje.
Përmes një njoftimi për mediat, lëvizja Vetëvendosjee ka quajtur marrëveshjen e djeshme “pazar fjalësh që prapë ia humb Kosovës 8,200 hektarë”
“Pas fjalëve të forta në seancën e së premtes në Kuvend, Kryeministri Haradinaj qenka marrë vesh me LDK-në për votimin e demarkacionit me Malin e Zi. E kanë shtuar fjalën “si orientim” për raportin e Komisionit Bulliqi, duke dashur ta krijojnë përshtypjen që edhe po e përfshijmë Raportin që akuzon e rrënon Komisionin Meha, edhe të mos e marrim seriozisht atë. Kështu nuk shkruhen e nuk bëhen ligjet. Ky pazar fjalësh na i humbet 8,200 hektarë njësoj. Ky Projektligj ishte i padrejtë dhe i dëmshëm e tani bëhet edhe më i keq pas këtyre akrobacive; ai është krim dhe tradhti që duhet kundërshtuar e nuk duhet legjitimuar”, thuhet në kumtesën e VV-së, përcjell Telegrafi.
VV thotë se “brenda vitit AAK-ja ndryshoi qëndrim për demarkacionin. Brenda ditës ndryshoi qëndrim për Komisionin Bulliqi”.
“Siç duket, PDK-ja e LDK-ja janë pajtuar për ta shfrytëzuar ambicien vetjake të Ramush Haradinajn vetëm sa për t’i kaluar këto projekte të dëmshme. Më pas, kjo qeveri pa numra, edhe ashtu mund të bjerë. Nuk ka gjë më të keqe se sa kthimi në opozitë pas një qeverisjeje të dështuar. Kush mund të bashkëpunojë më me ty, nëse ia vendos vetes vulën e tradhtarit?”, thuhet në njoftimin për mediat.
“Duke qenë se Kryeministri i njeh mirë të gjitha argumentet kundër këtij versioni të demarkacionit dhe pavarësisht kësaj, dëshiron që ta kalojë, e bën atë edhe më përgjegjës se të tjerët. Qëndrimi i tij është zmbrapsje. Ai është zmbrapsur me t’u bërë Kryeministër dhe po tërhiqet plotësisht tani kur e ka mundësinë që t’ia shpëtojë Kosovës 8,200 hektarë, ose t’i falë ato për të mbetur thjesht Kryeministër. Asnjë lakmi nuk mund të jetë mbi shtetin dhe territorin e Kosovën. Askush nuk është i autorizuar për të nxjerrë tokën e shtetit të Kosovës në pazare”.
“Ne nuk e mirëkuptojmë dhe as e kuptojmë zellin e askujt që shtyn një marrëveshje të tillë për vendin. Lëvizja Vetëvendosje nuk do ta votojë këtë Projektligj të dëmshëm. Lëvizja Vetëvendosje do ta kundërshtojë atë”, thuhet në njoftimin e VV-së.