Basha me banorët e Astirit: Të anulohet projekti i Unazës

377

Banorët e zonës së Astirit të cilët preken nga projekti i Unazë së Re kanë dalë edhe pasditen e sotme në protestën e tyre në ditën e 27. Banorët kanë bllokuar rrugën ndërsa nuk mungonin thirrjet ‘shtëpia jonë, jeta jonë’.

Në mbështetje të banorëve kanë qenë edhe deputetë të opozitës si dhe kreu i PD, Lulzim Basha. Gjatë fjalës së tij, Basha tha se PD do mbështesë banorët dhe sipas tij zgjidhja është anulimi i projektit të Unzës.

“Deri më sot siç e keni bërë dhe ju të ditur tre fakte kanë dalë në dritë, korrupsion në prokurim, korrupsion në hartimin e projektit dhe korrupsion me mënyrën si është vepruar me pronën e qytetarëve, banorët. Kemi të bëjmë menjë aferë të madhe korruptive. Ditë pas dite si mediat dhe opozita kanë bërë të ditura këtë. Këtu po vidhen mijëra euro. Janë paratë e qytetarëve që po vidhen. Ne jemi dhe do të jemi në krah të qytetarëve.

Zgjidhja është anulimi i këtij projekti dhe dërgimi para drejtësisë i atyre që kanë shkelur ligjin. Nuk do ti lëmë vetëm qytetarët. Bashkia e Tiranës nga një anë është kthyer në lavatrice të pastrimit të parave të pista me leje ndërtimi dhe nga tjetër me shembull kampion i korrupsionit e me taksa të larta”- tha Basha.

Basha tha ndër të tjera se ka një padi nga banorët për këtë çështje, por heshta e Prokurorisë tregon se kryeprokurorja Arta Marku është palë me vjedhjen.

“Ka një padi nga banorët. Heshtja tregon një prokurori që është bërë palë me vjedhjen. Duhet t’ia vini mikrofona Arta Markut, nuk del ajo, kush do që de nga dyert e prokurorisë duhet ta pyesni se çfarë po bëhet me kallëzimin e banorëve”, shtoi kryedemokrati.

Në mbështetje të protestuesve kanë qenë edhe deputetet e LSI Nora Malaj dhe Kejdi Mehmetaj.