Naftëtarët në gjendje të rëndë, Rama: Do shkruaj një libër për këtë çështje, kam bërë lloj lloj lutjesh, shkova kastile për të takuar presidentin e Azerbajxhanit

61

Teksa prej 9 ditësh naftëtarët e Ballshit janë në grevë urie, kreu i qeverisë Edi Rama thotë se shteti nuk mund të ndërhyjë me paketa ndihmëse, pasi kjo është një marrëdhënie mes privatësh.

Rama tha se është marrë aq shumë me këtë çështje, sa do të mund të shkruante një libër, por sipas tij gjeneza e të gjithë problemit është privatizimi kríminal që i është bërë rafinerisë.

Sipas kreut të qeverisë, punonjësit nuk kanë pse të hyjnë në grevë, pasi ata janë dëgjuar vazhdimisht nga kjo qeveri, që edhe pse ka më shumë se 7 vite në pushtet, nuk ka mundur që të shtrëngojë kompanitë private që operojnë në vendin tonë, që të shlyejnë detyrimet e prapambetura.

Ajo është një kompani private, dhe këto janë pasojat e një privatizimi kríminal. Unë vetë jam përfshirë disa herë që ti ndihmoj ata njerëz, duke bërë lloj lloj lutje nga më të habitshme, do shkruaja një libër më vete për përpjekjet që kam bërë në gjithë këto vite.

Shkova enkas që të takoja presidentin e Azerbajxhanit, për të folur për këtë çështje, sot pasdite do të përpiqem të mësoj ça ka ndonjë të re sërish. Ne kemi ndihmuar sa kemi mundur, por të na thonë se ne jemi përgjegjës për këtë, është e tepërt.

Ne kemi bërë dhe do të bëjmë çmos, por privatizimi ishte kríminal dhe nuk u bënë kurrë investime serioze për të ripërtërirë kapacitetin e saj. Unë jam shumë i shqetësuar, e rëndësishme është që të bëjmë diçka, më vjen shumë keq për njerëzit atje, por nuk mendoj se ka nevojë për greva urie që të më sensibilizojnë mua. 

Nuk ka nevojë që të bëhen greva urie, pasi ne i kemi dëgjuar, problemi është se ajo rafineri e ka thelbin e kalbur, do një investim afatgjatë për të funksionuar deklaroi Rama. E.K/Faxweb.al