Një i ri ka hedhur një granatë ofensive në oborrin e vjehrrit.
Fatmirësisht nuk ka shpërthyer ndonëse i kishte hequr siguresën
Ngjarja ka ndodhur mbrëmjen e djeshme në fshatin Pllanë në Lezhë.
“Ky shtetas dyshohet se për motive të dobëta, ka hedhur në oborrin e banesës së vjehrrit të tij, shtetasit Z.D. banues në fshatin Pllanë, Lezhë, një granatë ofensive të cilës i kishte hequr siguresën, por nuk ka shpërthyer” informoi policia.
Policia ka zbardhur ngjarjen dhe ka vënë në pranga 28 vjeçarin P.D. vjeç 28, banues në Mirditë.
“Shtetasi P.D, prej disa kohësh kishte mosmarrëveshje me bashkëshorten dhe ushtronte dhunë fizike ndaj saj dhe për këtë bashkëshortja e tij ishte e pajisur me urdhër mbrojte” informoi policia.
Në vendngjarje kanë shkuar ekspertët xhenierë të Reneas, të cilët kanë bërë shpërthimin e kontrolluar të granatës.
Materialet procedurale u referuan në Prokurorinë e Rrethit Gjyqësor Lezhë për veprat penale në ngarkim të shtetasit P.D. “Vrasje me dashje e mbetur ne tentative” “Mbajtje pa leje dhe prodhim i armëve shpërthyese e municionit”.
